Friday 28 December 2012

ZONUNMAWI

Tùr nipui hráng vùng a hér lûai lûai,
Pi leh pu nun dan a hèr liam pui;
Nun thar duhawm a hèr chhuah pui,
Itsík, elrèl chalcháng a fam rûai rûai.

Zonun mawite’n a vul leh nan maw,
Thangthar lung fing zawngte ka sawm vel e;
Hríl a chawi a vawng zel ‘ing e,
Chhawm nung zel ang than mawi nan aw.

A pamhmai lua piallei thuahriat hnuai a,
Liam a thlafam rûn lawi tur chuan;
Thlang kawla mual a liam hma khuan,
Zoram nuama’n lo vul leh sela.

Chutin kan hming a thang mawi ang,
Khuavel kan tan a par chhuak ang.


Rhyme Scheme : abba, cddc, effe, gg

(Rhyme scheme neiin kan ti ve chhin ang e.)

Tuesday 2 October 2012

HRINGLANG TLANG ATANGIN

Tap chungin khawvel ka hmachhawn tan a, hlimna karah tap chung bawkin hun ka chhiar liam leh a, hlim taka khawvel chhuahsan erawh ka la inbeisei fàn a. Chu mi hma chuan ka tan hlimni her chhuak ve hian ka ring tawh meuh lo. Ka lawmna leh hlimna, ka awmkhawhar min hnemtu chu ka tan vék tahna min thlén bang lotu a ni ta si.

Thursday 24 May 2012


Lasi nen kan  Hmui a intawng

March thla hian nikhat chu sa changa ramvah ka chak ang reng khawp mai a, tlaia ramvah tumin ka rilru ka siam sauh sauh a. Tukṭhuan eikhamah chuan ka silai kua te ka hawlh fai a, ka puchhuak khat deuh tawh bawk a a lo bal hle tawh a. Uluk em em in ka tuaihnum hlarh a, eng dang vak tih tur ka nei lo bawk a, silaimu pawh pa 5 lai chu ka siam hman a, tlawlh mai mai lo turin ka theih tawka ulukin ka siam a, zen lam pawh ka thun muk thawkhat hle a. Tlai sachan hun chu a thleng har ka ti tawh takzet a ni.

Ka ṭhu fel..
Ni a tlangsang ve zel a, chawhnu tlang a rawn her ṭan dêt dêt a, kal turin ka insiam thuai a, ka kal chhuak ta a. Nghalduh ram lamah ka kal a, a hmun ka thlen chuan ṭhutna tur ka zawng nghal a, hmun rem deuh mai, nghalrual hnu leh sakhi hnu ṭhat deuh maina hi a lo awm a, chutah chuan ka ṭhu ta rân a.

Monday 9 April 2012

ṬHADANGI

                                ṬHADANGI

                         BLB/10
                             14th Feb. 2010
                          
       1.  Ka tawnah par mawi chuang nang ngei,
            Ami leng zawng khumtu;
            Hmangaih duatte’n min chawi laiin,
            Min pe hlimna, lawmna, natnate nen.

       2.  A pawi ngei mai khua tuah loh ‘d’,
            Ngaih ni bang lo tur hi;
            A chuai dawn lo ngaihlai Bawihte,
            I tan ka hlan ka hmangaihna zawng zawng.

       3.  Hmangaihna vanduai maw lo ni,
            CHun leh zua lawm nan tiin;
            Uangpui chang lo \henna biahthu,
            Min hlan ta maw ka tan vanpui a chim.

        4. Ui chung zela then ṭhadangi,
            A hlui thei mawlh si lo;
            Ni chhun zan awmkhua harin,
            I sakhmel mawi zia tin a thar leh thin.

                Hlimte’n leng la vangkhaw mawiin,
                I lungdum ‘d’ ngei tawng leh na’ng che.

Monday 19 March 2012

THEN HRANGTU HUN NUNRAWNG


He leia ka lo piang ve hlawl mai hi a mak zia sawi dawn ila, ka taksa ruangam dintuin min hrilh hria a nih ngawt loh chuan kei ve tehlul hian ka sawi thiam lo nasa ngawt ang le. Chu achhapah eng thil pawh ka tiha min awmpui reng thintu hian engtik khawtikah mah ka theihnghilh ngai rêng rêng tawh loh tur leh an hlimthla avanga lunglenga vân ruai tura min lo duang kher phei hi chu mihring theihnaa sawi fiah rual a ni lo lehzual a. Hlim taka kan khawsak ho laite, kal zêl dan tur sawia kan rik laih laih laite kha khuarei an chang mek zel a nih si chuan, ‘Kan la ngai dawn mang e khua reiah....’ tih mai loh chu kan thiamna leh kan theihnain a phak bak thil a ni ta si!

Inpawh tlang taka kan awm hma, 2009 kum bul kan tan chhoh lai vel te ngaihtuah chuan kan hun hman liam takte kha uihawm tih piah lam ramah kan ral thlir ta doh doh mai zawng a nih hi! Hlim ni chhui kir tur a tam tehreng nen lungngaih ni leh inbakkaih ni erawh keini, chhul khat chhuak ni hauh lo, Krista avanga unau lo ni ta te karah sawi tur a tam lo hle mai. Kan hun hman ho tawp ni chauh lo kha chu..

Tuesday 13 March 2012

Chelh din rual loh THIHNA


Damin kan piang a, kan na lawi ṭhin a. Nungin kan piang a, kan thi bawk ṭhîn. Mihring leh thil nung eng chî pawh hian hmabâk kan nei a, kan pan bek bek a, kan hmabâk dang zawng zawng kan hlen chhuah vek hnua thil pakhat la awm chhun chu thihna; mi zawng zawng hmaa awm leh nunna nei tawh phawt chuan a paltlang ngei ngei tur hi a ni.

Thursday 9 February 2012

NOVEMBER 14



A hma zan aṭang chuan March ni 16 lo thleng mai tur chu a nghahhlelhawm hle
mai a. Zante chu rei bik  riau hian a hriat a. Zan a ral a, khawchhakah ni a chhuak leh a nih ngai chuan kum tawp ekzam kan zawh ni a ni dawn a, a nghahhlelhawm duh hle a. ‘Naktuk’ chu lo thleng thuai turin a tua te pawh chuan kan nghakhlel ṭheuh hlawm a. Rina pawh a nghakhlel ber zinga mi a ni.
    Rina hi thingtlang mi a ni a. Khaw lian lem lo, In zathum vel lêk awmna khua, khawchhak tlang dunga piang leh seilian a ni a. Thiamna sang zawk puak chhuah tuma Aizawl-a college zawm hlim a ni. A unaute nen mi In luahin an khawsa ve nawk nawk a. Class kala nitin a chhuah ve takah chuan ṭhian tharte a chhar belh ve zel a. Chu’ng a ṭhian chhar tharte zingah chuan a nuna mi bik ni rêng tawh tur leh engtik khawtikah mah a theihnghilh ngai tawh loh tur, Malsawmi pawh a tel ve a. A ni telin an inkawmngeih deuh deuh a,an  inngaina tial tial a, hun eng emaw ti hnuah phei chuan ṭhian satliah nihna chu hlipin, an khawvel chu hmangaihnain an awp bet ta hial a. Rina tan chuan tum lawk loh mang ṭhami nei ang a inchan rûm rûm a awl hial ta ve ang!

Wednesday 1 February 2012

The Last Goodbye

   (Ka ṭhianpa thu min hrilh)
    "Ṭap chungin khawvel ka hmachhawn ṭan a, hlimna karah ṭap chung bawkin hun ka chhiar liam leh a, hlim taka khawvel chhuahsan erawh ka la inbeisei fàn a. Chu mi hma chuan ka tan hlimni her chhuak ve hian ka ring tawh lo. Ka lawmna leh hlimna, ka awmkhawhar min hnemtu ber chu ka tan vék ṭahna min thlen bang lotu a ni ta si.

Saturday 28 January 2012

Hmangaih Ramah

  
                                  
     Kan khualzinna khawvelah hian hringnun hi lungngaihna leh hrehawmnain a khuh bo lek lek chang a awm ṭhin a. Ṭhenna ram khawvelah kan cheng miau a, kan mi duh tak, kan ngaih em emte fam rolungmualah, kan lei taksa kan put chhung a hmu leh tawh ngai reng reng lo turin kan thlah liam thin a. An lei taksa nung reng chung a ‘Hmangaih Lungduh’ kan ṭhen chang a awm bawk ṭhin. Hlimna kan chan laiin lungngaihna a lo hnai a, lungngai vawr tawpa kan awm laiin hlimna tawp lo changin Van khawpui, lungngaih awm tawh lohna hmun chuan min thawi dam leh ṭhin. Ṭhenna reng reng awm tawh lohna hmun ropui thlen nghakhlel em emtu leh chu hmun a chawl tate hlimna puan sin ve hun nghakhlel em em tu, amah Lalduhawma Chhakchhuak chuan -

“Ram nitla ngai lo chatuana engah chuan,
Aw chutah hmangaih kalta te an leng e;
Zaiin an fak an Tlantu Lalnunnema,
Chatuanin fak hla reng an chawlhtir  dawn lo.”