Chelh din rual loh THIHNA

Damin kan piang a, kan na lawi ṭhin a. Nungin kan piang a, kan thi bawk ṭhîn. Mihring leh thil nung eng chî pawh hian hmabâk kan nei a, kan pan bek bek a, kan hmabâk dang zawng zawng kan hlen chhuah vek hnua thil pakhat la awm chhun chu thihna; mi zawng zawng hmaa awm leh nunna nei tawh phawt chuan a paltlang ngei ngei tur hi a ni.

Thihna hi tihtâwp theih a ni lova, tumahin an thuhnuaiah an dah thei hek lo. Nunna hian thihna chungah thu a nei lova, thihna zâwkin nunna chungah thu a nei a ni si, her danglam rual a ni lo. 

Thi tura inpeih tumah an awm ngai lova, khuarèl thihna a lo thlèn hian hrethiam pawh an awm ngai rëng rëng lo –– lungawi zêl thei mi chauh lo chu! Duhin duh lo mah ila, thihna hian loh theih lohvin kan nunna chungah thuneihna a nei a, a roerelna ṭihbaiawm tak kan chungah a lek ngei ngei ṭhîn. Mihring zîngah hian dam rei tak tak an awm a, taksa chakna hloh ṭhak khawpa tar pawh an tam. An vânglai hun hmang zova, an tih tur apiang hlen zo vek tawha inngaia, hlen zo pawh an awm ngei mai; thihna chauh lo chu.. Thihna hi nunna neite pumpelh rual loh thil awm sâ a nih  avangin.

Thihna hi lungchhiatthlâk tak angin lang mah se, lungngaihna leh natna te, buaina leh manganna te, hrehawm tinreng  kalsanna kailawn a ni. Khawvelah kan chêng a, rilru buai leh hah rëng rëngin nun kan hmang a, hahchawlhna hun rëng a awm si lo. Chutiang buaina leh manganna zawng zawng kalsana, hahdam leh thlamuang taka muthilh siai siai chu hrehawm taka nun reng ai chuan a thlanawm fé zâwk lo’ng maw..? ka ti mai mai ṭhin.

Thenkhatin thihna chu thil rapthlak, engkim tawpna niin kan ngai ṭhin. He thlirna hi chu dik viau mah se, a tehfung hian a khâp thawi mah mah a ni. Thil engpawh a thim lam a awm chuan a êng lam a awm ngei ngëi thin. Thim a chhah poh leh êng a lang fiah thin.

Tehfung pakhat aṭang chauh hmanga thil thlir chuan thil zawng zawng hriat a har ṭhin. Chuvangin mihring nun pawh thlirna pakhat chauh hmang lova kiltin aṭanga thlir chuan hlimna leh lâwmna leh nawmsakna te pawhin hringnun hi a vêtchhuak ve chial tho mai. Lungngai taka kan awm laiin hlimna hian min lo hmuak a. Hlim taka kan awm liain ngùina thlarau chuan min lo hnaihchilh leh hle tawh ṭhin. Chuting vel a nih avang chuan thihna hi lungchhiatna lam hawi ringawta kan thlir chuan a fuh thei ngai lovang.

Thihna hian hmun leh ram bîk nei lo mah se, mi zawng zawng chu khua leh tui nihna a pe a, a khua leh tui atan a senglût ṭhîn a lo ni!

Kan pian ni aṭangin zirna kan hmachhawn nghâl a, naupang zirna, tleirâwl zirna, puitling leh tar nih thlengin zirna hian min kalsan lo. Dam chhûng kum eng emaw zât kan hman chhûng hian chawlh lailâwk châng kan nei ve zeuh ṭhîn; mahse, a va’n rei lo lulai ṭhîn tak êm! Zirna in belh laia chawlhlâwk chhûng ang lek hi a ni a, chumi chhûng chuan harsatna chinfel hman chu sawi loh, buaina kalsan hman pawh a ni ṭhîn si lo.

Nunkhaw nawm nan tiin kan duh zâwng kan eiin kan in a, tui taka kan kâ aṭanga lût ṭhînte pawh rimchhe takin mawng lamah a chhuak leh ṭhîn. Khualzinna ramah hian mite duh zâwng leh lawm zâwngin awm ṭhîn mah ila, kan tâwpna hmun kan thlen chuan khawvel chhuahsanin thlânkhur chhûngah kan tawlh liam a, nunna ângchhûng ata chhâkchhuahin kan awm ṭhîn. Chutiang bawk chuan thawmhnaw mawi leh man tam tak tak kan ha a, mahse, chul hun a nei ṭhîn a, lunghlu pawhin a hlutna a hloh ṭhîn –– a ngaihlutu, lunghlu aia hlu zâwk a ral hun chuan.Tin, lunghlu leh rangkachak aia nunna hi a let taam takin a hlu zawk a. Mahse, nunna pawh hi engmah lo mai a ni ṭhîn.

Thih hnuah thil awm tur awmin kan ring a, kan beisei a, chumi atan chuan kan inbuatsaih ṭhîn, thi tur ni lovin... Tichuan, kan thi a, thlânkhur thûk taka laiin kan inphûm a, chu chu kan tâwpna chu a ni. Chuta awmte chu buaina leh harsatnain a chîmbuai phâk tawh lova, kum sâng tam tak liam tâ pawh chu hmuna awmte tân chu mitkhap kâr lek aia a reina a awm lo va, chutih hunah chu thihna râpthlâk tak leh mitthite chanpual, hmun ṭihbaiawm ber kha hmun râlmuang ber a lo chang ṭhin.

Pialral kai chak tak chungin damchhûng hun kan hmang a. Kan beiseinate a nihna ang anga a thlen dik beisei em em chungin dam kan thlahlel em em a, thih aiin nun kan thlang fo ṭhîn. Thi mai tura kan inngaihtuah chângin lungngaiin kan indawmkun a, ding taka inngaihtuah phei chuan thih hreh luat avânga mittui a rawn hnâm ṭiam ṭiam ṭhîn. Hei hi eng vâng nge ni ang le ti a ka ngaihtuah châng hian, “Pialrâl kai kan châkna ngawt ai chuan a panna lamlian zawh kan zuam lohna a lian zâwk a ni,” ka ti ṭhîn.