The Last Goodbye

   (Ka ṭhianpa thu min hrilh)
    "Ṭap chungin khawvel ka hmachhawn ṭan a, hlimna karah ṭap chung bawkin hun ka chhiar liam leh a, hlim taka khawvel chhuahsan erawh ka la inbeisei fàn a. Chu mi hma chuan ka tan hlimni her chhuak ve hian ka ring tawh lo. Ka lawmna leh hlimna, ka awmkhawhar min hnemtu ber chu ka tan vék ṭahna min thlen bang lotu a ni ta si.
     Kum 2008, Ṭau thla, tahrik ni 13 a lo her chhuaka, chu ni chu kei, heti khawpa haihawta tan hian ni chhinchhiahtlak, rilrua vawn reng ka tum loh chung pawha ka theihnghilh theih hauh loh ni pawimawh a ni. Pathianni a ni a, chawhma inkhawm banah a langa ‘ka lungdi’ ka tih ngam chiah si loh, mah se, ka thisen zam zawng zawng pawhin ‘I lungdi a ni lo’  min tihpui theih hauh loh nen kan leng dun a, a engamah hmain ka rilru a hlim nghal sárh ringawt mai a. Mahse, ka ṭawng a bahlah zova, ka ṭawngkam thiamnain min phatsan a, kawlvalenchhamah min thlawh bosan ta vek ni ber hian ka hria. Ka dang awkin min lem zova, sawi tur ngah em em khan a hun takah sawi tur ber ka vai leh si. Hlau ni si lovin ka khur ru dèr der a, ka che a fuh thei meuh lo a ni.
    Ka hlim em em a, ṭawngkau chheh a bahlah zo vek lawi si! Ani pawh a hlim ve hle tih hai rual a ni bik lo.
    Chumi ni aṭang chuan khawvel thar kan thlir dun thei ngei dawn ni hian ka hria a, kan hlim dun reng bawk a. Keimah tak phei chuan a thim zawnga thlir tur engmah ka hre lo a ni ber mai. Engpawh ti ila, a phurawm zawng zelin ka ngaihtuah a. Chu ka hlimna chuan min vaw let ang tih ka ngaihtuah phak ngai reng reng lo.
    Hun eng emaw chen hlim taka kan inkawp hnu chuan neuh neuh a awm ṭan ta a. Thuthang ngaihthlak nuam lo tak takin min ṭhawng ta fo mai a. Hrehawm ti taka hun ka hman leh rilru kawma khuantevik men thlen chang ka nei ta fo mai. Ka duh vanga meng hrep zel erawh ka ni hauh si lo.
    Hmangaihna hi eng nge maw a nih chiah le? Engkim a fun khawm vek a, chutih rualin buar par thliin a chhema a darh chiai chiai ang maiin vawilehkhatah a thlawk bo leh diak si ṭhin. Hriau zum tak ang a ni a, a chhun pawh na tak a ni.
    Hmeichhe hmangaihna phei chu luite tui lian ang lek a ni. A thawh laiin na takin a thawk a, a phul bulh bulh a, a ri pawh a ring narawh. Mahse, boruak inlumlet hun a lo awm a, fur hun a liam a, ṭhal a lo thleng ang mai hian, hmangaihna hmasa chu kalsanin hmangaihna thar lam an pan leh ruak ruak ṭhin.
    Hlimna tehfung atana ka lo hman \hin kha a hmantlak lo tial tial a. Natna namenlo min thlentu a lo chang ta zawk a. Hmelṭhatna pawh ka tan chuan anchhia a chang zo a. Nula hmelṭha kawppuia neih a hahthlak zia ka hre chhuak uarh uarh ni berin ka hria!
    Hmangaihna hi nun tihlimtu a ni. Mahse ka tan ve chuan natna leh lungngaihna, hrehawm tam tak min thlen bang lotu a ni ta. Bawihi chuan natna min thlen bang lo a, natna tawrhhlelhawm tak nen min luhkhung a, hliam na tak min hnutchhiah a, min kal bosan leh daih si a. Kan hlim dun lai ni te ka ngaihtuah chhuak fo lo thei si lo. Theih nise ka hriatchhuah fo lohna turin chatuan atan piallei thuahriat hnuaia phum bo daih mai ka va duh em!
    Hmangaihna avangin hmangaihtu chuan a hmangaih chu a ṭhen a ngai ta a.
    Engatinge ‘Mahse’ tih a ngaih ṭhin a, eng vangin nge ui em em chunga ‘liam mai rawh’ tih a ngaih thin le?
    Lunglenna kut vawtin min man a, ka taksa, ka thisen zungzam zawng zawng a fan chhuak vek a. Lungngaihna sár a zam chiai a. Chakna réng ka nei ta lo. Mahse, Lalpa’n a hmangaitute tana a siam  piallei mawina ni leh thlain a phei hrut lai hmu tur erawh chuan zuahin ka la awm ve hram hram a ni."