Sunday, 7 December 2014

KHUA RII RIAI CHU

Kawl a hnîm riai e,
Hrilh ka hai lung ka vai ;
Uaiin a pil ta e,
A zalna piallei dai.
Ri dur durin darkhuang a pau e,
I sakruang mangtha nan zai kan sa;
I sakhming erawh a ral dawn si lo.
Raltiang kaiin rihtlang i liam a,
I chinlai unaute chuann maw;
'A pawi em mai lo kir leh rawh' tiin kan au chia,
I dawn tawi lua em ni kir i rel si lo.
Chatuan chatuanin hlimin i leng tawh dawn maw..
Uiawm viau mah la, KA PU ka lawmpui che asin..

Christmas hi

Thlasik a ni a,Christmas kan thleng hnai leh ta.Masi kan hman dan hi, Lal Isua pianchamphaphak lawm kan ni tih ngaihtuah lovin mahni duh dan leh nuam tih zawngin kan kût thin chu a ni si a. Lal piang lawm kan ni tih hre reng theuh ila a va duhawm em!

Khawvel ropuina leh mawina, hmingthanna te mahni tana seng khawm duh vang ni hauh lovin, tlawmna puan sinin Krista chu khawvel sual tlan turin a lo kal a. A lo kal ni kan lawm thin hi a ni Christmas chu. He ni kan lawm thin hi a ropui a, khawvel thilte nena khaikhin zîa a ni lo.

Kût ropui atan Bethlehem Mualah:-Thlasik khaw vawt tak karah Josefa leh a nupui Mari chu Sabengtung chunga chuangin hmanhmawh takin Bethlehem laman pan hnak hnak a. Midang ruala kal pawh an tan thil awlai a ni lo! Mari naupai hrin hun ruai tawh avang chuan mi ruala kal ve thei lovin an theih tawka hmanhmawhin an inchhawm ve bêk bêk a.

Hah hnepin Bethlehem chu an thleng ve thei hram a. Mari'n nau a vei chhunzawm ta lehnghal! Mahni tùl tùla an tùl hle lai leh mahni mum muma an mum mawp mawp lai chuan Josefa erawh a buai hle a. Midang anga tih tur a ngah em vanga phili erawh a ni ve hauh lo.
Mangang takin riahna tur hmun tha an zawng ruai a. Mahse an tan Khualbukah hmun a ve awm lo! Ran In rimchhia leh tawp takah an innghat lo thei ta lova.
Thlasik khua a vawh zual lai ber, hun tihbaiawm, rukru leh suamhmang nunrawng takte chet duh hun lai, zan a reh tlawk tlawk lai ngei mai chuan, a puma naute awm chu, nula thianghlim Mari chuan a hring ta! Ran chaw pekna thlengah an muttir a, nau piang Hmeltha-a chu tui takin a muhil siai siai a.

Mi fate ang lo takin ran thlengahah an muttir a, lainat leh hmangaih taka thlirtu, a nu leh pa tan chuan ennin a har tluk zetin a lainatawm ngawt ang le!

Hmuntawp tak chu Lal Krista pianna hmun, hmun thianghlim a lo chang ta a, chu chu a ni Christmas lo intanna chu.

Lal thar lawmin angel thianghlim rual pungkhawmte'n remna thuchah hla mawi, ruahtham loh hla ropui an rem a. Chutih laiin hmel en rêng rêng pawha pa neinung an ni lo tih hrit tak tak, pa bumro takte'n Rangkachakte, Berawte, Murrate kengin nau piang chibai an rawn buk ve asin!

Kût Râpawm!:- Christmas kan hman dan hi kawng dik min kawhhmuhtu atan chuan a hmantlak meuh lo chu a ni. Seol natna min veitira, nikinniah thiamloh min chantirtu a ni mai ang tih a hlauhawm hle mai.

"Thian thenkhat ten Mas hun hi, sual tih nan an hmang thin a.." Thenkhatin ruihhlo tihna'n leh sual rawngbawlna hun remchangah an hmang a, Masi laia lu tihhai deuh chiai loh chu changkan lohnaa ngai tawk lah bo lo.

Urlawk zan kan hman dan lah lawmawm lam aiin rapawm lam hawi a ni fur a. Mahni nihna hloha urlawk zan hmang, kohhrana akul-ataia inhmang thin thalaite hian eng rilru nge kan put thin le? Ruih zan emaw kan ti em ni? Urlawk zan hman luat avanga loh theih loha nupaa in-zawhteno-lak an awm fo bawk!

Krista rawn kal chhan hliahkhuh vek khawpa kan kût a nih ngat chuan Van lal Fa lung kan tihnûr hle ang. Lawmna lungrun kût ropui tia a sakhming chhal a nih loh nan mahni nun theuh vawn thianghlim i tum ang u.

Sunday, 30 June 2013

JULY 1 (Ka pu thih champhapha vawi 1-na)

Lungngaihna leh manganna ten a chim buai phak tawh loh hmuna thlamuang taka chawlta hriat reng tur nei ve zawng zawngte pualin he thu hi chhiar theih turin ka rawn chhawpchhuak e. A ngaihnawm zawnga chhiar tum tan chuan ngaihnawm a tling lovang a, a lungchhiatthlak zawnga chhiar tum tan pawh bianga mittui luan tir zawih zawih tur chuan a tling tawk kherin ka ring lo. Rilru-a awm tlangpui chauh a ni e.

Ka puin a lei nun, hrehawmna leh harsatna tinrengten chimpil an tumna hmun ata a zalenna champhapha vawikhatna a lo thleng ve ta reng mai. Ni tam a la liam lo emaw kan tih chhungin kum a lo vei der mai chu a nia. Lunglenna muhil dawn suar suar tawh kha muhil hman tak tak si lovin a rawn tho tha leh a, heti reng reng a hun a liam zel a nih chuan kan heti reng mai dawn chu a ni si a le!

Saturday, 22 June 2013

DAMLAI LU VAWI 2 KA SUN

(Thianpa Awmtea Thu ziak. A nih ang angin ka rawn chhawp chhuak e)
)
Mimkut thla a ni a, a tahrik ni chiah ka hre ta lo. Kum 2009 kha a ni. Ka tihdan thin pangaiin zing ka tho chuan ka phone ka lek chhuak a, khum atangin nidanga ka phone thin chu phone in tha takin kan inbia a, a aw mawi dan te, a aw ka hriat a ka hlim dante a pangai reng a ni a, ka tana a pawimawhzia chu nidanga a hnena ka sawi thin ang thovin ka sawi leh a, amah... ka biak theih avangin ka hlim ngai rengin ka hlim. Ka bialnu a ni a, a lakah beiseina ka neih a pangai reng thova. Eng eng emaw avanga inthen mai tha a a rin thu te a lo sawi zauh tawh nain ka then theih loh thu leh harsatna te chu eng ang pawh nise, keini pahnih kan inhmangaih chuan kan tawrh hram hram tur a nih thu leh kan pahnih inkar a that phawt chuan hmangaihna avanga kan la tawrh chhuah mai tur thu te ka sawi thin a, then zai reng ka rel ngai lova, engtik laipawhin a lakah beiseina leh rinna ka nghat tlat thin. Amah ka ngaihtuahin theih tawpin ka zirlai ka zir thin a, nakin lawk a a hlimnan tiin phur takin ka zir a, chakna min petu hnar lian tak a ni. A nia sin, amah ka ngaihtuah kha chuan ka engkim tih mai hi a nuam ka ti sarh mai a, ka hlim veng veng thin.

Friday, 28 December 2012

ZONUNMAWI

Tùr nipui hráng vùng a hér lûai lûai,
Pi leh pu nun dan a hèr liam pui;
Nun thar duhawm a hèr chhuah pui,
Itsík, elrèl chalcháng a fam rûai rûai.

Zonun mawite’n a vul leh nan maw,
Thangthar lung fing zawngte ka sawm vel e;
Hríl a chawi a vawng zel ‘ing e,
Chhawm nung zel ang than mawi nan aw.

A pamhmai lua piallei thuahriat hnuai a,
Liam a thlafam rûn lawi tur chuan;
Thlang kawla mual a liam hma khuan,
Zoram nuama’n lo vul leh sela.

Chutin kan hming a thang mawi ang,
Khuavel kan tan a par chhuak ang.


Rhyme Scheme : abba, cddc, effe, gg

(Rhyme scheme neiin kan ti ve chhin ang e.)

Tuesday, 2 October 2012

HRINGLANG TLANG ATANGIN

Tap chungin khawvel ka hmachhawn tan a, hlimna karah tap chung bawkin hun ka chhiar liam leh a, hlim taka khawvel chhuahsan erawh ka la inbeisei fàn a. Chu mi hma chuan ka tan hlimni her chhuak ve hian ka ring tawh meuh lo. Ka lawmna leh hlimna, ka awmkhawhar min hnemtu chu ka tan vék tahna min thlén bang lotu a ni ta si.

Thursday, 24 May 2012


Lasi nen kan  Hmui a intawng

March thla hian nikhat chu sa changa ramvah ka chak ang reng khawp mai a, tlaia ramvah tumin ka rilru ka siam sauh sauh a. Tukṭhuan eikhamah chuan ka silai kua te ka hawlh fai a, ka puchhuak khat deuh tawh bawk a a lo bal hle tawh a. Uluk em em in ka tuaihnum hlarh a, eng dang vak tih tur ka nei lo bawk a, silaimu pawh pa 5 lai chu ka siam hman a, tlawlh mai mai lo turin ka theih tawka ulukin ka siam a, zen lam pawh ka thun muk thawkhat hle a. Tlai sachan hun chu a thleng har ka ti tawh takzet a ni.

Ka ṭhu fel..
Ni a tlangsang ve zel a, chawhnu tlang a rawn her ṭan dêt dêt a, kal turin ka insiam thuai a, ka kal chhuak ta a. Nghalduh ram lamah ka kal a, a hmun ka thlen chuan ṭhutna tur ka zawng nghal a, hmun rem deuh mai, nghalrual hnu leh sakhi hnu ṭhat deuh maina hi a lo awm a, chutah chuan ka ṭhu ta rân a.