Thurochhiah

Lasi nen kan  Hmui a intawng

March thla hian nikhat chu sa changa ramvah ka chak ang reng khawp mai a, tlaia ramvah tumin ka rilru ka siam sauh sauh a. Tukṭhuan eikhamah chuan ka silai kua te ka hawlh fai a, ka puchhuak khat deuh tawh bawk a a lo bal hle tawh a. Uluk em em in ka tuaihnum hlarh a, eng dang vak tih tur ka nei lo bawk a, silaimu pawh pa 5 lai chu ka siam hman a, tlawlh mai mai lo turin ka theih tawka ulukin ka siam a, zen lam pawh ka thun muk thawkhat hle a. Tlai sachan hun chu a thleng har ka ti tawh takzet a ni.

Ka ṭhu fel..

Ni a tlangsang ve zel a, chawhnu tlang a rawn her ṭan dêt dêt a, kal turin ka insiam thuai a, ka kal chhuak ta a. Nghalduh ram lamah ka kal a, a hmun ka thlen chuan ṭhutna tur ka zawng nghal a, hmun rem deuh mai, nghalrual hnu leh sakhi hnu ṭhat deuh maina hi a lo awm a, chutah chuan ka ṭhu ta rân a.

Thawm ka hria..
A la hma bawk a,meizial zuk te ka’n siam leh rih a, thlifim rawn thaw heuh heuh chuan awm a tinuam phian a, thawsa a reh fel deuh chauh tihah chuan tlang lam ṭhang pik hmun a\ang chuan eng emaw hi a rawn ri chho sân sân a, sa thawm ni ngeiin ka hria a, inring takin kap mai thei turin ka lo inring rân a...

A va rawn lang har tak..
Inring em em, kah thluk ngei ngei tuma ka lo intintuah reng avang chuan rawn lang vat vat se, lo hawl thlu tawp mai teh ang ka ti rilru reng a, mahse a rawn lang mai thei si lo. Ka beisei angin thil a awm dawn lo em ni ang aw ka ti hman chauh a. A rawn ri hnai zel a, hmun fai chin a rawn thleng ta hlawl mai!

A va lian em..!
A rawn lan takah chuan rin aiin a lian. A tep chuap chuap a, tui tih hmel takin thing rah tla chu a chhara a ei rawp rawp a. A len em avang chuan a chal darah tak ka kah loh chuan ka kap tlu zo dawn lo tih ka hre reng mai mah se, silaimu thlakna hun a awm tawh lo. Ka silaimu thun sa chuan chu nghalchang hrawl zet chu ka’n kap a, a vir zuk a, na ti hmel pawhin a lang lo, a rawn chhuahna mualah bawk chuan a kal liam leh ta.

Ka ui lutuk..
Mahni chauha han chhui zui chi a nih loh avangin a tuk khawvar huna chhui zui atan ka hawsan a. Mut hmunah pawh a lo thi ang nge thi lo ang tih ngaihtuah reng rengin hun ka hmang zankhua a. Khawvarah kawmchhak pa nen kan zu chhui a, a hnu chhui a nuam viau na a kan nangching thei tlat lo, mak tak maiin a thawm hriat phak lek lek hian a kal zel a, han tawp san mai uiawm tawk tak zelin ka hma hla vak lovah a kal zel a.

Kan hawsan..!
Kan hlawhtling dawn lova kan hriat avangin ui tak, beiseina nei chunga beidawng tak siin kan hawsan ta ringawt a. Hlawhchhama haw chu kan hahna nena khaikhin  chuan a inmil meuh lo a ni.

Hah hnepin in kan thleng a, ka nuin lasi tui tak min pe nghal a, ka fawp ta vawng vawng a, ka hahdam nghal sawng sawng a. Lasi fawh hi a lo nuam a ni.