Hnatlannaah ka lung a leng!

April ni 7 a ni ang a, K.Ṭ.P kan hnatlang dawn tih chu ka hre reng mai. Hnatlan ngei pawh ka tum a. Ni 7 ni a lo thlen chuan hnatlang tur chuan ka thawk chhuak ve ta ngei a. 207-in kan kal a, kan kal lam chuan khua a ṭha a, ni a sa hle a. Tichuan, hlim tak leh tluang takin kan hnathawhna tur hmun chu kan thleng a. Hnathawh kan ṭan hmain Pathian hnena inhlanna hun kan nei a, kan thawk ṭan nghal mawp mawp a.

Ṭo haw hunlai a nih avangin khuain min bumro ngei ang tih ringin ṭhahnemngai takin ṭan kan khawh sauh sauh hlawm a. Tluang tak chuan kan thawk ve zel a. Kan chettlatna hmun hi kham awih em em mai a ni a, thingtum lian tak tak nena inkawmho na'n chuan duh aiin a awih lam hret chu a ni. A awih em avangin fimkhur turin kan inhrilh mawlh mawlh reng a. Chutia kan inhrilh reng chhan chu kum lama la naupang deuhte leh a nawlpui aia thaza hret an awm ve nual vang a ni. Harsa takin eng emaw chen chu kan thingtum tawlh pawh chu kan thlen thui thawkhat hle tawh a. Mahse, motor phurh theih tura buatsaih tur chuan beih fe a la ngai tho mai. Dar 2:00 p.m. velah chuan a hma aṭanga kan hlauh lawk em em thli leh ruah chu a rawn thawk ṭan ta nge nge a!

Ṭo haw tih takah a thawm a na zek lehnghal. Thli thaw hum hum chuan kan vela thing lian pui pui te chu mu leh mal pawh nei lovin a rawn chhem thle nghawl nghawl a, ruah mal hraw pui pui pawh a rawn tla ri phoh phoh bawk a. Sepui ruah dova do ngawt chi a nih miau loh avangin kan tlanchhe lo thei ta lova, laklawh takin kan hna chu kan tlansan a, hun remchang hmasa bera chhunzawm leh turin kan thil duh em em chu kan tlanchhiatsan ta hrih a.

Hmanhmawh baklenga kan tlan chiam hnu chuan thlam nuam tak mai, kan ṭhian ṭhenkhatte ei rawngbawla an lo chet velna hmun kan thleng ta a. Kan ri chel chul hlawm a. Chu an rawngbawlna thlangah chuan thlam dang nuam tak pakhat a awm bawk a. Kan tawt deuh avangin eng emaw zat chu chutah chuan kan chhuk thla ta nghe nghe a. Ruah a tla hnem tial tial a, Thli lah a thaw na tulh tulh bawk a. Thlam kawngkapui, ruah theh loh chinah chuan ṭhuthmun ka rem a, chutih lai chuan thlam chung rangva chu thli na takin a chhem ruahpui chuan a thleh ri chur chur bawk a.

Midang thawm laih laih pawh chu ngaihven lêm lovin ral lehlam thing hnah bu lawp lawp te chu ka thlir reng a. Sulhnu leh nun hlui ka chhui kir țan ta a. Naupang se en rual vel kan nih laia Zilhri phaia thlipuiin min nuai țuma kan mangan zia te, lenkhang zar kan en laia keite in min tihțhaiha lui ko ko sang ațanga lung țhin a rawn vawm thlak er er te leh thil tam tak ka rilruah a lo lang zut zut a.

Tleirawl/rawlthar kan nih chhoh țan laia nula rim kan duh ve si, lut hmasa tur kan inhnawn kan inhnawn țhin lai te, lut hmasa tur kan inhmuh zawh loh vanga kan țilhțiak fo te nen lam chuan chhui letin a awm a. Mahnia nula kan intih rim ngam ve țan chhoh lai vel te khan, sawi tur hre lo leh titi vawrh ngam hauh si lova leng haw hun thleng thlenga ngawi reng a kan awm ve ngar ngar țhin dan te, chaicheh leh suankual hum renga zak țet țet chunga thingpui kan han in ve kerh kerh țhin te kha, a hunlaia zahna kawn paltlang tur a tam ve zia te nen lam chuan ka ngaihtuah rauh rauh a. A hunlai chuan zahthlak tak a ni.

Tun hnua ka ngaihtuah let leh changte hian, hun hi a danglam nasat tawh zia hrilh hriatin ka awm fo țhin a. Lehkha inthawn hun a liam a, inrim bur bur hun pawhin mual a liam chho mek a, nakin lawkah chuan 'Siamrem inneihna' te hi kan la sawimawi ngeiin a rinawm ta.

Tunhmaa 'tun' kha, 'hmanah chuan' kan ti a, tunlaia 'tun' ngei pawh hi 'hmanlai' a la ni ang.