(Thianpa Awmtea Thu ziak. A nih ang angin ka rawn chhawp chhuak e)
)
Mimkut thla a ni a, a tahrik ni chiah ka hre ta lo. Kum 2009 kha a ni. Ka tihdan thin pangaiin zing ka tho chuan ka phone ka lek chhuak a, khum atangin nidanga ka phone thin chu phone in tha takin kan inbia a, a aw mawi dan te, a aw ka hriat a ka hlim dante a pangai reng a ni a, ka tana a pawimawhzia chu nidanga a hnena ka sawi thin ang thovin ka sawi leh a, amah... ka biak theih avangin ka hlim ngai rengin ka hlim. Ka bialnu a ni a, a lakah beiseina ka neih a pangai reng thova. Eng eng emaw avanga inthen mai tha a a rin thu te a lo sawi zauh tawh nain ka then theih loh thu leh harsatna te chu eng ang pawh nise, keini pahnih kan inhmangaih chuan kan tawrh hram hram tur a nih thu leh kan pahnih inkar a that phawt chuan hmangaihna avanga kan la tawrh chhuah mai tur thu te ka sawi thin a, then zai reng ka rel ngai lova, engtik laipawhin a lakah beiseina leh rinna ka nghat tlat thin. Amah ka ngaihtuahin theih tawpin ka zirlai ka zir thin a, nakin lawk a a hlimnan tiin phur takin ka zir a, chakna min petu hnar lian tak a ni. A nia sin, amah ka ngaihtuah kha chuan ka engkim tih mai hi a nuam ka ti sarh mai a, ka hlim veng veng thin.
Chutia kan inbiak laite chuan a bulah chuan naupang tawng nak nak thawm leh a bula an lo ninhlei avanga a hau thawm te ka hria a, khang naupang ho kha, khawi lam mi nge, tu fate nge an nih ka ngaihtuah lova, ngaihtha takin a hau thawmte chu ka ngaithla ve mai mai a. Ka ngaihzia thu leh hmuh ka chakzia thu chu ka sawi luam a tichuan phone chu ka dah ta a.
Ka mood a tha dawn mange tiin ka thova, thutthleng sei lamah chuan ka insawn phei a, ka ngaihtuah let neuh neuh a, dik tak chuan ka lung a leng a, amah kha ka ngai a ni. Rei fe thutthlenga ka mut hnu chuan Laldiki chuan, “Lalawm, i bialnu khan pasal a nei a mi?” a rawn ti hlawl mai a, “Nei nang, neih pawh ka hre hleinem, nichinah pawh kan in biak zawk chiah kha” ka ti a, a ngawi veleh mai a. Ngaihtuah zui nachang pawh ka hre lo, ngaihthat lohna pawh ka nei chuang lo. Tukthuan kan ei a, kan ei lai chuan an sawi chhuak leh a, ka lo hre miah lova, ka unaute ho chuan ka hre tawh emaw an tia, an lo sawi lo mai mai chu niin. Zing ka thawh hma pawh a, ka bialnu la ni reng, ngai em em a ka biak, hmuh hun nghakhlel em em a ka thlir ve reng kha, minu, pawmlai nei, pasal nei lai a lo ni reng tawh a nih chu. Karei maw, bar mai tuma ka chaw ken lai chu ka dah let leh a, ka ka chhunga la cham bang tlem azawng ka thial niap niap pawh chu thial chhunzawm turin tha ka nei tawh lova, tlem azawng la chambang lem tur pawhin chakna ka nei lo, ka dang kuaah hian kha chaw tlemte kha a leng tawh lo a ni ber. Ka zang huih ni ber hian ka inhria a, ka bing mup mup ringawt. Ka unau mi pangate leh kan mikhual Korami te nen tukthuan kilin dawhkan kan kil ho a, ka mittui dang tura ka insum nasat zia kha. Theihtawpin ka incontrol a, mittui erawh ka veng hneh hram, ka chaw ei erawh a tawp chiang kher mai.
Tichuan ka unaute ho chuan an sawi zui nak nak a, tin, heti hi a lo ni a, hmana amah ngaizawngtu ni a an sawi, a thiannu ngei ngei pawhina ka hnena a sawi dan chuan a duh loh em em mai, upa tawh tak leh fa pawh nei tawh, cable Tv pakhata thlalatu nen an lo in nei reng tawh a lo ni a. Engtin nge ka hriat loh theih, engvangin nge ka chhung ten min hrilh loh?? Zingah te khan mi nupui duhlai kha kei chuan ka bialnu a ni e, tih rilru a pu chungin ka phone ve a, ka tan chuan vana rah ang a lo ni reng tawh mai a lo ni a. A na ka va han ti tak em, ka ngaihtuah chhunzawm a, hei lo liam a ‘damlai lusun’ hi a awm thei lovang. Kei vala hian mi pakhat lakah vawi hnih ngawt mai hetiang thil hi a thleng a nia. 2007 khan kan inthen lawk laiin pasal a nei a, rei loteah a lo kir leh a, kei ve te hian ka lo pawm leh a, rei loteah kan inngaihzawn lai ngeiin pasal dang a nei leh a. Ani lakah kha chuan ka thang tlawm ve chiang alawm.
Kum a liam fe tawh a, tha takin pasal a nei reng a, a fa pahnihna pawh a piang leh tawh. Kei pawhin chhailai D ka tawng a, ka hlim ve khawp mai. Mahse, mi dangte ang ve thovin thinlaiah a lo cham chang a awm leh thin a, ngaihtuah chhuak leh thin mah ila, ka hmangaihna erawh ka hlan thei tawh lova, kha hmangaihna hmasa kha bansanin midang tan theihtawp ka chhuah a, tunah chuan, hmangaihna thar nen, mithar nen ka hun ka hmang a, ka hun kal tawh min theihnghilh tirtu leh nunhlui ngaihchang pawh a min hnemtu tha tak mai ka tawng tawh a, ka nuntharah hian ka hlim em em a, khuanun ka tan a ruat zel ang tih hi ka ring tlat a ni. Engtikah emaw chuan nupui neih ve hunte a la awm ve ngei ang a, chutih hunah chuan a tawpna atan ‘M’ remtihnain sawmna pawh a hmu ngei ang. Kha tih hunlai khan mipakhat lakah damlai lu vawi hnih ngawt ka sun a nih chu.. Hei hi khawvel a ni miau a...!
No comments:
Post a Comment