Lungngaihna leh
manganna ten a chim buai phak tawh loh hmuna thlamuang taka chawlta hriat reng
tur nei ve zawng zawngte pualin he thu hi chhiar theih turin ka rawn
chhawpchhuak e. A ngaihnawm zawnga chhiar tum tan chuan ngaihnawm a tling
lovang a, a lungchhiatthlak zawnga chhiar tum tan pawh bianga mittui luan tir
zawih zawih tur chuan a tling tawk kherin ka ring lo. Rilru-a awm tlangpui
chauh a ni e.
Ka puin a lei
nun, hrehawmna leh harsatna tinrengten chimpil an tumna hmun ata a zalenna
champhapha vawikhatna a lo thleng ve ta reng mai. Ni tam a la liam lo emaw kan
tih chhungin kum a lo vei der mai chu a nia. Lunglenna muhil dawn suar suar
tawh kha muhil hman tak tak si lovin a rawn tho tha leh a, heti reng reng a hun
a liam zel a nih chuan kan heti reng mai dawn chu a ni si a le!
A tute zinga upa
ber ka ni a, ka hming pawh hi ka pu sak kha a ni. A tute zinga upa ber ka nih
vang nge ni ang ka pu khan min duat em em a, ka hriat theih chinah zirna kawng
a ni emaw, eng thilah pawh hlawhtlinna ka neihin min lawmpuiin min hlutpui em
em thin. Zirna bikah phei chuan naupangtê ka nih lai, lawmna chang pawh ka
hriat tak tak hma atang tawhin exam na a ka pass min lawmsak loh vawikhat mah
ka hre lova, min tiphurtu ber a ni thin.
Pathian zarah
tluang takin zirna lamah kan kal ve zel a. Amaherawhchu, II B.A ka failed a,
chumi tum pawh chuan min hau miah lovin min fuih sauh sauh zawk a; tichuan II
B.A pawh chu ka exam ve leh a. Hemi kuma ka failed avang hian ka naute pahnihin
min rawn umpha a, kan unau thumin B.A final year chu kan zirho ta a.
B.A final kan
exam zo a, result kan nghak a. Result a lo chhuak a, kan unau 3 chuan kan
passed theuh a. Mite anga result chhuan tlak nei lo mah ila kan lawm ve em em
tho mai. Kan result chhuah ni hi June 30 a ni. Kan result kan hria a, kan lawm
em em rualin ka pu erawh biak tlak a ni tawh lo! Oxygen Bur kan inchhawp a,
chumi hmang chuan a la thaw ve tawk tawk chauh a ni si a!
A mak ngawt mai,
lungngaihna namen lo kan chunga a tlen laiin hlimna tur thil pawh a lo thleng
tel ve tho a! Amaherawhchu, hetiang huanah hi chuan hlimna lo thleng thin mah
se, lungngaihna tizualtu bak a ni thei tawh thin si lo. Kan unau thum
hlawhtlinna chhetê te kha hrilh hriat theih la ni ve tehreng sela chuan keini
aiin a hlim leh ang a, a va’n lawm nasa leh dawn em aw..
Kan exam zo kan
haw min hmuh veleh min chibai a, “I dam maw, in rawn tluang em? Bawiha, in
result a chhuah hunah in passed chuan a lawm nan hei i pi nen vawk kan lo vulh
a nia,” a tih ri te kha ka bengah hian a la cham reng a. Mahse, kan passed
lawmna atana an vawk lo vulh pawha min lawmsak hmain, June 30 khan min kalsan
ta mai si a; hriatthiam a harsa tak zet a ni.
Ka nupui nen
hian fa nei lovin kum khat leh a chanve lai kan awm a, kan chhungkua rau rauah
pawh ka pu hi fa kan neih hun nghakhlel ber a ni hial awm e. Chuvang chuan ‘Pathianin
fa min pe ve hlauh a nih chuan ka pu hian a hming sa ngei se,’ tiin kan
nupa pawhin kan sawi thin a. Mahse, nu pum chhunga nau a awm hma hawta
sawichhuah erawh a tihchi ber si lova.
Ka pu a’n dam lo
chho a, mu leh mal a neih loh chhoh zel takah chuan ‘nau hming’
sak lawk tir mai chu kan duh ta a. Mahse, ‘nau hming sa lawk rawh’ ti
ila a rilru kan timangang lutuk ang tih kan hlau leh lawi bawk si. Chutia kan
rilru a insual mek lai chuan ka pu chuan min boralsan a ni chawpchilh ta mai
bawk si a, ngaihtuahna a buai duh map map ngei mai.
Thlana ka pu kan
thlan liam ni chuan kan nu hian ka Nitei fate (Ka Nitei fate hi unau 4 an ni
a, a upa pahnih hi hmeichhia leh mipa an ni a; phir an ni. Tin, a naupang
pahnihte pawh phir bawk an ni; hmeichhia ve ve an ni thung. An unau 4 hian an
birthday a inang a, November 18 a piang an ni) a awm nasa hle a, a kawng
nat thu min hrilh a. Thlan nghah niah pawh chuan a kawng na chuan ziaawm lam
aia zual lam a pan mah zawk avangin a zun kan han test (pregnancy test) a, nau
a lo keng reng mai chu niin! Pathian remruat lo thlen dan hi a mak ka ti lo
thei lo a ni. Ka puin a hriat chak em em thil pahnih a hre hman lo chiah ve ve
a. Hria se a hlimin a lawm dawn tehlul nen. Tihngaihna dang a awm chuang si lo.
A hming satu tura kan rilruin a tinzawn ber a awm
tak si lovah chuan kum 4 vel liam ta atanga hming mawi ka tih em em ka sa a, R.
Lalramhlunpuii tiin. Tunah chuan naute pawh a changkang ve viau tawh a, nun a
tihlim viau thin. Amaherawhchu, sawi leh sawi hnu, ka pu khan naute hmel hi hmu
ve se, duat takin eng emaw chen chu min enkawlpui se, Lalramhlunpuii pawh a pu
malchungah thlamuang takin han khawsa ve ni se la aw...tia duhthu ka sam tam
luatah Lalramhlunpuii hian ka lung a tichhe lek lek fo mai. Zirsangzela
Hnamte-in “Ka hlimna tur zawng pawh tahna an chantir e,” a tih
ang mai kan ni zo ta.
No comments:
Post a Comment