THEN HRANGTU HUN NUNRAWNG

He leia ka lo piang ve hlawl mai hi a mak zia sawi dawn ila, ka taksa ruangam dintuin min hrilh hria a nih ngawt loh chuan kei ve tehlul hian ka sawi thiam lo nasa ngawt ang le. Chu achhapah eng thil pawh ka tiha min awmpui reng thintu hian engtik khawtikah mah ka theihnghilh ngai rêng rêng tawh loh tur leh an hlimthla avanga lunglenga vân ruai tura min lo duang kher phei hi chu mihring theihnaa sawi fiah rual a ni lo lehzual a. Hlim taka kan khawsak ho laite, kal zêl dan tur sawia kan rik laih laih laite kha khuarei an chang mek zel a nih si chuan, ‘Kan la ngai dawn mang e khua reiah....’ tih mai loh chu kan thiamna leh kan theihnain a phak bak thil a ni ta si!

Inpawh tlang taka kan awm hma, 2009 kum bul kan tan chhoh lai vel te ngaihtuah chuan kan hun hman liam takte kha uihawm tih piah lam ramah kan ral thlir ta doh doh mai zawng a nih hi! Hlim ni chhui kir tur a tam tehreng nen lungngaih ni leh inbakkaih ni erawh keini, chhul khat chhuak ni hauh lo, Krista avanga unau lo ni ta te karah sawi tur a tam lo hle mai. Kan hun hman ho tawp ni chauh lo kha chu..

“Pathian Hmel” ngei maiin bul kan han tan a. A hnu lam chu sawi loh, khatih hun lai pawh khan Chawnglianmawia, Vairengte(C-a’n) Bass Part a sak nalh theih zia kha ka lo hre khiau tawh nia maw le! Mah se, a hunin a la zir tawk lo bawk nen ka fiam ngam ngang si lo. A thlawh nalh thin zia a hnuah khan ka hrechiang lehzual a, mak tihnain ka khat ta hial a!

Chawhlui kan kil ho hma kha chuan hetiang dinhmunah hian kan ding ang a, kan hun hman liam takte ngaiin kan la kur ang tih rêng ka ngaihtuah phak lo. Mahse, kha thil khan boruak inmung mek chu a rawn chhem alh chho tan rêng a lo ni. Tun hnua ka ngaihtuah kir leh hian a tin hmasa ber pawla ka tang kha ka ui hnuhnawh kher mai, inchhirin ban a pel tak meuh a ni e.

Khami ni a kan hlim zia te, Pathian fak leh chawimawia kan zai nasat zia tak kha aw! Pathian hlain a daih tak loh avanga lenglawng lam hawi a ngaih tak dante kha a mak ngawt mai. Kha hun nuam tak kha chatuan hmunah pawh kan ko kir tawh dawn si lo! Kil khata Johny (Lawngtlai) leh Awma (Zote) te an lo thu ngawi ve rêng te kha, a hun lai khan engmah sawi lo mah se, tun hnuah hian thu tam tak an sawi ta a ni lo maw?

Kan awmdan leh kan nihnate kan inhrethiam a, kan harsatna leh kan lawmna zawng zawng kan inhrilh ngam thin te kha a hlutna kei chuan ka teh chhuak zo dawn hauh lo mai; a ril em asin. Ka dam chhung hian khatiang hun danglam kha tawng leh ang i maw? Pathianin ka nunna chungah zahngaihna a lan tira, tu leh fate ka lo nei ve te a nih ngai chuan, kan hlim nite khan mual min liam san tawh mah se, famkhua erawh a lawi ka phal hauh lovang!

Sum tuaka kan thawh ho dan nuihzat thlak takte kha ka ngaihtuah let changa ka nuih  tiza bang lotu chu a ni; C-a nena kan kal sual nasat zia mawlh mai kha! Thakthing Tlanga vur(LASI) la tura min tirh tuma, Tuithiang mawng kan pan chhak chhak mai kha chu(h)! Thingfak lian nelh nawlh paw’n min lo hlap sela vuihmui pu ngam chi kan va ni dawn lo rua em! Mahse, an thin a rim hauh lo kha a mak kan ti teh a nia aw.

Kan inpawh tlan zia a lanna pakhat chu na tak taka kan infiamnate huata kan la ngai hauh lo kha a ni. A hmei a pain kan infiam bawrh bawrh a, huat a hnekin kan hlim phah phian zel a nih kha maw. Amaherawhchu, hun thununna hnuaia leng kan ni miau a, ‘Khawnge lung ka rualpuite kha, khawilam tuan zai rel ve maw e.... Hmanlai an chang zo ta.’ tih a ngai ta si.

Lei mawina chena khawvel taka khawvel chen hauh si lovin, chawhlui kan kil ho rêng kha kan hlim  tlang thin asin.  Kan vawikhat eikhawmna mawlh mai kha, Vlc Vanlalhriatrenga(Champhai Kanan) zai rin theih zia leh, a bik taka Nunui, O.em-i(Reiek) leh Mariana(Republic) ten an lawm zia kha,  lawm em em mah se a awm hliah hliah tho, a zai ring em tak atin ni. Kan unaunute che vel leh nun zia a hmuhnawm thin khawp mai. Mawng zang tak mai a engkim an sawngbawl lai hmelte kha mitthla ah a cham reng thin. An rawngbawl sa inthlahrung hauh lovin keini lah khan kan ei mawp mawp zel mai si, Hotupa RD Lalfakawma(Missionary-a kal ta. Khatla) leh VLC-a te pahnih bakah Amtea(Zaithiam) te phei kha chuan ei chin tawk an hriat loh a leiah chaw bel a fai kelh nghe nghe maw ni kha?

Kan inkhawm naa thusawi tha tak, tlawmte ni a lang, mah se Lalpa’n malsawmna a vur thin, thu tha an hnen atanga ngaihthlak te kha a va kham awm loh tehlul em! Engtik khawtikah mah kan ti ho dial dial tawh dawn si lo.

E! ka mangnghilh tep, Sis. Amulin lo kal nia kan chét chùkchu hlawm zia kha! Khami ni zet kha chu, a hun lai kha chuan a nuihzatthlak miah lo, mah se tunah erawh lunglen belhchhahtu mai mah ni se nuihzat lamah a kal ta! Khami nia kan inkhawm programme ang kha hmang kumtluan ta ila hming thar a piang tam duh awm mang e ti raw C-a?

Hei chauh hi a ni lo. Joint service kan neih tur chungchang vel kan rel tuma kan chokidar-in thinrim zet maia min rawn hauh laia kan zah hlawm zia kha. Pawn lam mi kha awm lo se chu a ziaawm deuh tur a nia le. Mak deuh mai chu harsatna leh hlimna tam tak kan tawh te kha min phuar nghettu, hruihrual thami an lo ni ta vek hi a ni.

Synod H.S.S a Joint Fellowship kan hman tuma kan hlimna te kha a leia lei theih rual a ni lova, Pathian thlarau hruainain kan tum kan hlen thei a, lawmna tham a ni tlat asin. Synod HSS Drama chang lo lawm zual lah bo lo. Thusawitu, Benny Jr. ka tih mai, Vlc-a hnen atangin sermon kan ngaihthla ropui ngang bawk mai. Kham lo tak chungin kan tin a ngai ta mai si te kha  a pamhmai ka va ti tak em.

Hun hian hringnun a nghak ngai si lova. Hlim tlang taka hun leh ni kan chhiar mek laiin kum tawp kan lo hnaih leh dêr tawh a, Sikpui Ni pawh a lo de tan leh suar suar tawh a. Ni chhuak hlimte chuan tlang leh mual a ‘phei hrut’ zet zet a. Zing daifim tlak a hun tan leh dêr tawh mai bawk a. Chu’ng daifim, thing hnah leh hnim lei depa to chunga tlate chu Sikpui ni chhuak hlim chuan, lunghlu an pai emaw tih mai tur khawpa mawiin a chhun tle sêr sêr a. Thing hnah chawr no hlep hlepte pawh chu a chhun no nghual mai bawk a, huihchhuk thli leh thlifim thaw heuh heuhte chuan a chhem bu leih leih hlawm a, chu’ngte chuan lungno an khawih tlat a, tawrh a har em em zel a ni.

Hun leh ni a liam zel a, kan hlim lai nite pawh ‘chu’ hun chuan zahngaihna tel hauh lovin a nuai bo tan mek zel a. Ui sáteh mah ila, hun inher liam mek chu keini ho tan chelh din zawh rual a ni si lo!

Ni 17 December 2009-a chawhlui kan kil ho tuma ‘Vansang mu ang’ mai a hlim taka kan han chai ho te kha a nuam ngawt mai. Kan chet lak dan erawh a inang vek lo tih kan hre vek. Thenkhat No tikeh zawngin an khawsa a, chutih laiin Andy-a(Pastor zir mek) te thung chuan puar tawk bak ei tumin theihtawp tak meuh an chhuah a, pum leh tukkhum dawm vang vanga a thu lai, duh khawp a hmu tawh emaw tia a chaw thleng lo phih dawk sak zawk tawk kan awm bawk. Mahse, keini ho karah kher kha chuan engkim a lenga, âwm lo pawh a awm lo. Eng pawh ti ila, eng pawh sawi ila kan hlim pui em em zel. Mahse, eng anga hlimna nasa pawh khan min tuam thin mah se, lung ti leng zualtu tur, thenhrangtu hun nunrawng a lo ni reng mai!